MOITHU

മൊയ്‌തു....

നമ്മടെ എല്ലാം പേരിന് പിന്നിൽ നായരും മേനോനും വരുന്നതിന് മുൻപുള്ള കാലം..

ചന്ദനകുറിയും തലയിലെ തുണികെട്ടും പരസ്പരം മത്സരം ഇല്ലാത്ത സഹോദര്യമായി കാണുന്നവർ കുറെ കൂടുതൽ ഉണ്ടായിരുന്ന കാലം..

പർദ ഇട്ടില്ലെങ്കിൽ മതം ജനങ്ങളെ വേട്ടയടാത്ത കാലം

അമ്പലത്തിൽ പോകാത്ത ഹിന്ദുവും പള്ളിയിൽ പോകാത്ത മുസ്ലിമും പുട്ടിന് തേങ്ങാപോലെ സുലഭം .

ഈ അടുത്തകാലത് രഞ്ജിത്തിന്റെ സിനിമ കയ്യൊപ്പ് ഞാൻ വീണ്ടും കണ്ടു.ആ സിനിമ എനിക്കൊരു തിരിച്ചറിവാണ്..ഒരുതരം ബൈബിൾ.

മമ്മുട്ടിയുടെ ബാലൻ അതിൽ പറയുന്നുണ്ട് ,ഒരു ഫാത്തിമയെ ബാലൻ സഹായിക്കുന്നത് ഇവിടെ ഇന്നലെ വരെ പ്രശ്നമല്ലായിരുന്നല്ലോ എന്ന്.
എന്റെ വിഹ്വലതകൾ ഓടുക്കാൻ ഞാൻ ചിലപ്പോ സിനിമ കാണും,
ചിലപ്പോ റുവാണ്ടയുടെ വർഗപൊരുകളുടെ ചരിത്രം വായിക്കും.
മറ്റു ചിലപ്പോ ലോകത്തിലെ അറിയാതെയും അറിഞ്ഞും പോയ ഏകാധിപതികളുടെ ചരിത്രം വായിക്കും..

കയ്യൊപ് അങ്ങനെ എന്റെ സ്വന്തനം ആയിട് കുറച്ചു നാളായി..

ഈ കുറിപ്പ് ജനികുന്നതിന് കാരണം കയ്യൊപ് വീണ്ടും കണ്ടത് തന്നെ ആവാം..
ഒരു മാതിരി അസ്വസ്ഥതയോടെ അത് വീണ്ടും കണ്ട് എന്തിന് കണ്ടു എന്നറിയാതെ ഒരു സിനിമാകഥ മേനഞ്ഞെടുക്കാൻ നോക്കുന്നതിനിടക്കാണ് മൊയ്തു കയറിവന്നത്...

കാലങ്ങളുടെ പഴക്കമുള്ളത്.. ഓർമകളുടെ പഴക്കം ഇല്ലാത്തത്..

മൊയ്തു
വീട്ടിലെ വേളക്കാരനാണോ എന്ന് ചോദിച്ചാൽ അല്ല..
കാര്യസ്ഥനാണോ എന്ന് ചോദിച്ചാൽ അതും അല്ല..
പക്ഷെ ഞങ്ങടെ വീട്ടിലെ എല്ലാ കാര്യത്തിനും മുൻപിൽ നിന്ന ആൾ ആണ് മൊയ്‌തു

എനിക്ക് അന്ന് നന്നേ കുട്ടി.പത്തോ പന്ത്രണ്ടോ വയസ്സ്.
എന്നെക്കാൾ രണ്ട്‌ വയസ്സു കൂടിയ ചേച്ചിയെ മൊയ്തു വിളിക്കും ഗൗരിഅമ്മ ..മൊയ്തു കമ്മ്യൂണിസ്റ്റ് ആണ്.പക്ഷെ പള്ളിയിൽ പോകും.പേപ്പർ വായിക്കും.റേഡിയോ ന്യൂസ് ഒരു തവണ പോലും വിടാതെ കേക്കും.എന്റെ വീട്ടിൽ അച്ഛച്ഛനോട് ,ബി ടി രണാദിവെയോടൊപ്പം ബോംബെയിൽ പ്രവർത്തിച്ച കമ്മ്യൂണിസ്റ്റ് ആണ്, രാഷ്ട്രീയം പറയും..
എന്നെ വിളിക്കുന്നത് മൊറാർജി എന്ന്‌.അത് കേട്ടാൽ എനിക്ക് ദേഷ്യം വരും.മൂത്രം കുടിക്കുന്ന ആളെ ഞാനുമായി താരതമ്യം ചെയ്യുന്നതിൽ ദേഷ്യം വരും.
പക്ഷെ മൊയ്തു ഒപ്പം പറയും..
ഗൗരി അമ്മയും മൊറാര്ജിയും..
രണ്ടാളും മന്ത്രിമാർ ആകും...

സമാധാനം.

അന്നെല്ലാം നായർ വീടുകളിൽ ദലിത് ,മുസ്ലിങ്ങൾ വീടിനു പുറത്ത് നിൽക്കണം. ഉള്ളിൽ കയറാൻ പാടില്ല.മൊയ്തുവിന് വീടിന്റെ ഉള്ളിൽ കയറാം. ഭക്ഷണം വീടിന്റെ ഉമ്മറത്തെ പടിയിൽ ഇരുന്ന്‌ കഴുകാം..

ഒരു പണികാരൻ അല്ല മൊയ്തു. പണി ഉണ്ടായാലും ഇല്ലെങ്കിലും രാവിലെ വരും.ചായയും ദോശയും കഴിക്കും.എന്തെങ്കിലും ചെറിയ ചെറിയ പണികൾ ഉണ്ടെങ്കിൽ അവ സ്വയം കണ്ടെത്തി ചെയ്യും.
കൃഷി ഇട്ട നേരത്തു എല്ലാ സ്ഥലത്തും പോയി ചെടികളുടെ സുഖവിവരം അന്വേഷിച്ച് വരും.
പിന്നെ അച്ഛച്ഛനോട് ഒപ്പം റേഡിയോയിൽ വാർത്ത കേക്കും. അതിനെ പറ്റി ചർച്ചചെയ്യും.

കാര്യമായ പണി ഒന്നും ഇല്ലെങ്കിൽ ഞങ്ങടെ വീട്ടിൽ ഊണ് കഴിക്കാൻ തുടങ്ങുന്നത് കണ്ടാൽ പറയും..
ലക്ഷ്മിഅമ്മെ..ഞാൻ പോണു..

വേണ്ടട, ഇവിടന്ന് കഴിച്ചോ..

ഇല്ല..ഞാൻ പോയി വരാം...

ന്നാ അണക്ക് വെയില് കായണതിന് മുമ്പ് പോവായിരുന്നില്ലേ...

മറുപടിക്ക് മുമ്പേ മൊയ്തു പോയിട്ടുണ്ടാവും..

ഒരു നാലുമാണിയോടടുത്തു മൊയ്തു വീണ്ടും എത്തും..കാപ്പി കുടിക്കും.

മൊയ്തു നല്ല പണികാരനാണ്.ഓരോ സമയത്തും ചെയ്യേണ്ട എല്ലാ കൃഷിയും ഞങ്ങൾ ചെയ്യും.മൊയ്തുവും അച്ഛച്ഛനും തമ്മിൽ എല്ലാം തീരുമാനിക്കും

ഞങ്ങടെ പള്ളിയാലിൽ അന്ന് ചെയ്തിരുന്ന കൃഷി ഇപ്പൊ ആലോചിച്ച അത്ഭുതമാണ്.

നെല്ല്
പൂള(കപ്പ)
ഉഴുന്ന്
മുതിര
വാഴ
എള്ള്.
ചാമ

അങ്ങനെ വൈകുന്നേരം ആയാൽ പിന്നെ മൊയ്തുവിന്റെ പണി എല്ലാം തീരും.എന്നോടും ചേച്ചിയോടും കഥകൾ പറയാൻ തുടങ്ങും മൊയ്തു.. ജിന്നും മൗലവിമാരും ഹൂറിമാരും ഉള്ള നിറമുള്ള കഥകൾ..
ഇടക്ക് അച്ഛമ്മ പറയും

എന്റെ മൊയ്തു,നിനക്ക് എന്താ കുടീ പോയ്‌കൂടെ...

അന്നെല്ലാം ഹിന്ദുക്കൾ വീട്ടിൽ കഴിയുമ്പോ ദളിതർ ചാളയിൽ കഴിയും. മുസ്ലിങ്ങൾ കുടിയിൽ...
ഭാഷയുടെ ചതുർവർണ്യം...

മൊയ്തു പറയും

ലക്ഷ്മിഅമ്മെ ,ഞാൻ പോകാം. സമയം ആവട്ടെ...
ന്യൂസ് ഒന്ന് കേക്കട്ടെ..പിന്നെ കുട്ടികൾ എല്ലാം കഥ കേക്കട്ടെ..

ചിലപ്പോ നല്ല മൂഡ് ആണെങ്കി ഒന്നോ രണ്ടോ മാപ്പളപാട്ട് ഞങ്ങളെ മൂളി കേള്പികും..

അച്ഛമ്മ പറയും..

വഴീല് മുഴുവൻ നല്ല തലേല് നരവന്ന ഇനാണ്. നീ ഒരു ടോർച്ച് പോലും കറുതീട്ടില്ല... കൊത്തിയാ അപ്പൊ അറിയാം.....

ഇത് അവസാന ഭീഷണി ആണ്
പാമ്പ്.

മൊയ്തുവിന്റെ വീട് ഒരു പൊന്തകാടിന്റെ ചെരുവിൽ ആണ്.
ഊടുവഴികൾ കയറി ചെറിയ പാറക്കെട്ടുകൾ വഴി പോണം.
നരയുള്ള ഇനങ്ങൾ ഉണ്ടാകും..

നാട്ടിലെ മരുന്നില്ലാത്ത അല്ലെങ്കി മരുന്നിന്റെ ഫലം ഉറപ്പില്ലാത്ത പ്രശ്നം..

ഇംഗ്ലീഷിൽ മരുന്നുണ്ടോ ഉണ്ടെങ്കി തന്നെ അത് ആളെ രക്ഷപെടുതുമോ എന്നതിൽ നാട്ടിൽ പല ചർച്ചകളും നടക്കും..വൈദ്യരാണോ അതോ മുസ്‌ലിം മൗലവിമാരാണോ നല്ലത് എന്നതിലും ചർച്ചകൾ ഉണ്ട്..

രണ്ടുപേരും വിശ്വാസത്തെ ഉപയോഗിക്കും...ചില പച്ച മരുന്നുകളും പിന്നെ ഊതിയ വെള്ളവും വിശ്വാസത്തെ അറകെട്ടുറപ്പികാൻ വേണ്ടി ഉപയോഗിക്കും.
പാമ്പ് കടിച്ചാൽ പിന്നെ ഉള്ള പരിഭ്രമത്തിൽ മിക്കവാറും നമ്മൾ ശാസ്ത്രത്തെ മറക്കും.വിശ്വാസത്തിന്റെ ഒപ്പം പോകും..
അപ്പോ ഹിന്ദുക്കൾ വൈദ്യരുടെ അടുത്തും മൗലവിയുടെ അടുത്തും തന്നെആണ് പോകുക മിക്കവാറും..

മൊയ്തു തലയിൽ നരവന്ന ഇനത്തെ പേടിക്കാതെ പറയും..

ലക്ഷ്മിഅമ്മെ ,പടച്ചോൻ കാക്കും..അവൻ വിളിച്ചാ പിന്നെ പോകാതെ പറ്റുമോ...അവന്റെ വിളി വരണവരെ ഈറ്റങ്ങളോന്നും എന്നെ ഒന്നും ചെയ്യില്ല..

പിന്നെ ഇങ്ങലൊക്കെ ഇല്ലേ..ഇന്നലെ പോകുമ്പോ വഴീല് ഒരു ഊത്തൽ കേട്ടു..ഞാൻ ഒനോട് പറഞു.. യ്യു പൊയ്ക്കോ ..അന്നേ ഞാൻ..വടികൊണ്ട് നന്നായി വഴിയിൽ അടിച്ചു.. ഓൻ ഓടി പോയി...

മൊയ്തു എന്നും പോകുമ്പോ കയ്യിൽ ഒരു മുട്ടൻ വടി കരുതും. അതു വഴിയിൽ അമർത്തി അടിച് പോകും..പാമ്പ് ആ ശബ്ദം കേട്ടാൽ ഓടി പോകും എന്ന് വിശ്വാസം..

അച്ഛമ്മ പറഞ്ഞത് കേൾക്കാതെ കഥയും പാട്ടും കളിയാക്കലും റേഡിയോ നാടകവും സിനിമാ പാട്ടും രാഷ്ട്രീയവും എല്ലാം ആയി സമയം ഏഴരയോടടുക്കുമ്പോൾ അടുകളയിൽ പാത്രങ്ങൾ ചിലകും.'അമ്മ ചോറ് വിളമ്പുക ആണ്..

മൊയ്തു വെപ്രാളപ്പെടും.
ഞാൻ പോണു..

ടാ ,ഇനി കഴിച്ചിട്ട് പോ.

വേണ്ട , കെട്ടിയാൾ ചീത്ത പറയും..രാത്രി അവിടെ പോയി കഴിക്കാം..ഉമ്മയും കാത്തിരിക്കുക ആവും...

അങ്ങനെ എന്നും വൈകി അച്ഛച്ഛമ്മയുടെ ചീത്ത കേട്ട് ചീത്ത കേട്ട് മാത്രം വീട്ടിൽ പോകുന്ന മൊയ്തു ഒരു ശിവസം രാവിലെ വന്നില്ല.
അന്വേഷിച്ചപ്പോ അറിഞ്ഞു രാത്രി വഴിയിൽ ഏന്തോ ഒന്ന് കടിച്ചു. ഉടൻ തന്നെ ദൂരെ എവിടെയോ ഉള്ള ഒരു പാമ്പ് സ്‌പെഷ്യലിസ്റ്റ് ആയ ഊതുന്ന മൗലവിയുടെ അടുത്തു കൊണ്ട് പോയി..
പിന്നെ എന്നും വീട്ടിൽ പ്രാർത്ഥനയുടെ ദിവസങ്ങൾ ആയിരുന്നു.
അച്ഛമ്മ വീടിന്റെ പുറത്ത് നിൽക്കും.മൊയ്തുവിനെ പറ്റി ഓരോരുത്തരോടും ചോദിക്കും. അച്ഛമ്മയുടെ മന്ത്രങ്ങളിൽ മൊയ്തു നിറഞ്ഞു.
ഭഗവതിയോട് ഇനാം പറഞ്ഞു. അവനൊന്നും വരാതിരുന്നാൽ ഞാൻ ഭണ്ഡാരപ്പെട്ടിയിൽ പത്തു പൈസ ഇടാം....
ഓമന്നൂർ ശുഭദാക്കളുടെ നേർച്ചപ്പെട്ടിയിൽ പത്തു പൈസ....

മൂന്നോ നാലോ ദിവസം കഴിഞ്ഞു..
ഒരു ചാരു കസേരയിൽ ഇരുത്തി മൊയ്തു വന്നു. തിരികെ വരുന്ന വഴിക്ക് മൊയ്തു പറഞ്ഞു ഞങ്ങടെ വീടിന്റെ മുന്നിലൂടെ വരാൻ.
ആരോ വന്ന് അച്ഛമ്മയെ വിളിച്ചു.
മൊയ്തുവിനെ ഒരു ചാരുകസേരയിൽ ഇരുത്തി ആണ് കൊണ്ട് വന്നത്..നല്ല അവശനായിരുന്നത്രെ ..അച്ഛമ്മയെ കണ്ടതും രണ്ടാളും കരഞ്ഞുവത്രെ..
അച്ഛമ്മ കുറെ വഴക്ക് പറഞ്ഞുവത്രെ..മൊയ്തുവിന്റെ കണ്ണിൽ നിന്നും വെള്ളം ധാരയായി .....

ഇനി ഇല്ല ലക്ഷ്മിഅമ്മെ.ഇനി ഞാൻ നിങ്ങൾ പറയണപോലെ .....

പിന്നെ മൊയ്തു അതേവഴി വന്നിട്ടില്ല..

പിന്നെ മൊയ്തു ഒരു വഴി വഴിയും വന്നിട്ടില്ല....

(ഒരു ഫാത്തിമയും ബാലനും തമ്മിലുള്ള സ്നേഹം നാട്ടിൽ ഒരു പുതുമ എന്നാ ആയത്?

എങ്ങിനെയാ ആയത്‌?

എന്തിനാ ആയത്? )